KRYQËZIMI NË TI VARR Një poezi e shkruar para 20 vjetësh. Po e paraqes në përkujtim të 69-vjetorit të masakrës së Tivarit Nga RAGIP SYLAJ
E Martë, 04.01.2014, 08:38am (GMT+1)
Ju ishit bijtë e diellit Që banonit në çerdhe rrufesh Që marshuat mbi rrugë bajonetash Dhe vallëzuat mbi krisma
Ëndrrat tuaja u mbushën pllanga gjaku Në epokën e nekrofilisë Ç'jua këputi hijen e dashurisë Ju gulçua kënga e lirisë
Ju ishit mishi i grirë i Kosovës Ju jeni afshi i nxehtë i tokës Ju jeni dhembja dhe pikëllimi i kohës Ju jeni jeta dhe pavdekësia Jeni mallkimi dhe nostalgjia
Ju ende dremitni në çerdhe vetëtimash Të mbuluar me re mllefi re klithmash Gjaku juaj vetëtin flakë Kujtimi juaj kjason gjak
Ç'është një hije që bredh mbi Tivar Ç'hienë vallë atë e shqetëson Ç'valle eshtrash hidhet mbi atë varr
Mbase kishit shpirt të pamortë Bebëza engjëjsh kredhur në Tartar Më zi se Krishti q'e pësoi në Kalvar Ju gëlltiti ploja në Ti varr
(1994)
RAGIP SYLAJ
|