VOAL - Online Zëri i Shqiptarëve

BOTË NË MINIATURË Cikël i ri poetik nga QAZIM SHEHU E Shtunë, 04.05.2014, 08:13am (GMT1) PËR TONIN E TË KUQIT NË BUZË Për tonin e të kuqit në buzë, Për trillin e buzës që s`u puth, E ngrita këtë vjershë si rrudhë, Për puthjen e munguar u rrudh. Për ngjyrën që u ngjye me nge, Dhe dogji aty si flakë, Puthjen e ardhshme që fle Do e hetosh pak e nga pak. Kur ta japësh me nxitim, në buzën e faqen  që do, kaq bojë harxhohet me teprim, kaq flakë që  përvëlo. Kur puthja mungon, e kuqja, E ngjyrës që del nga tubi, Të bën ty si nusja Që së pari e zu turpi. E kuqja ethet të ngre, Zbret e ngjitet në mollzë, Dhe ti harruar e ke, Buzën e njomë. E kuqja e ka mbuluar Ngjyrën e brishtë të mishit, Si një flakë e tërbuar, Kërkon puthjen që ishte... TI JE Nga një rrugë kalim i butë shkohet në metaforë, Nga djerrina në borë, Nga bora në djerrinë, Dhe kështu fillojmë poezinë. Një re shtyn një re, dhe fsheh një shkëndijë, Shmangur me djallëzi nga shtëllunga hutuese, Tjetërsohet koha në ngurtësinë e saj të plotë, Ndoshta ngurtësinë reja e fshehu, Shkëndijën fshehu për të mos derdhur diku lotë... DITË Ditë inkadeshente, Trembur: lepur në ferra, Ditë të zgjatura. Nga djalli Të përmjerra. Ka ditë dhe ditë, Ka ditë që gdhenden dhe daltën, E flakin në harrim, Ka ditë që zvarriten dhe s`shënojnë, Asnjë kujtim. Ditë me një fantazi kandrre, Absurdi i kap për fyti. Ditë të fantazuara në kthina parajse, Ditë të dehura nga tymi. Ditë të hedhura në ditar dhe përse, Për lohjën e tyre mëkatare edhe ky varg s`ia vlen... NJË PEMË Një artikulim memec  do më pëlqente, Ta shtrija si një rreze të gjakosura mbi gjemba. Pa përgjigje. Nuk dihet çfarë vuan përbrenda, Një pemë e përmbysur rremba rremba... QAZIM SHEHU

Copyright © 2005-2008 Nulled by [x-MoBiLe]. All rights reserved.