VOAL - Online Zëri i Shqiptarëve - A ËSHTË E PËRGATITUR LIDHJA DEMOKRATIKE PËR TA QEVERISUR KOSOVËN?Nga SKËNDER BUÇPAPAJ

Këtë temë jam i detyruar ta trajtoj në forma kushtore dhe hamendësuese, për shkak të veçanësive të ligjit kushtetues të Kosovës dhe të realiteteve aktuale të jetës dhe të politikës në këtë kontekst. E shtruar pak më prekshëm pyetja e titullit të shkrimit do të ishte: A është e përgatitur Lidhja Demokratike ta udhëheqë qeverisjen e re të Kosovës?

Lidhja Demokratike e Kosovës ishte njëra nga dy partitë pjesëmarrëse në garën zgjedhore të 12 dhjetorit 2010, krahas Partisë Demokratike të Kosovës, që iu paraqit elektoratit me mëtimin që të dalë partia e parë nga këto zgjedhje e, rrjedhimisht, të ketë ajo mandatorin e ri për ta krijuar koalicionin e re qeverisës, pra shumicën e re partiake qeverisëse të Kosovës. Ky fakt parakupton që Lidhja Demokratike e Kosovës (LDK) të ketë qenë e përgatitur se kë do të mandatojë për kryeministër, kë do të thërrasë në koalicion, si do t'i përpjesëtojë postet në gjithë vertikalen dhe horizontalen e ndarjes së tyre, si do të pajtohet për programin qeveisë dhe, më në fund, të jetë qenë e përgatitur që ta qeverisë Kosovën për periudhën e ardhshme të afërt sa e lejon Kushtetuta apo sa e lejon realiteti praktik i vendit.

Gjithnjë referuar Kushtetutës, nëse ajo e parashikonte që tash, kur Partia Demokratike e Kosovës (PDK) të kishte dështuar në krijimin e koalicionit, atëherë, siç ndodh në shumë vende demokratike, do t'i binte radha partisë së dytë të dalë nga zgjedhjet e 12 dhjetorit 2010 për ta krijuar koalicioni. Kuptohet, e përjashtuara e parë do të ishte vetë partia kryesore e dalë nga këto zgjedhje, e cila, duke mos marrë besimin e partnereve në Kuvendin e ri të Kosovës, do të jetë e detyruar të kalojë automatikisht në opozitë.

Aleanca për Ardhmërinë e Kosovës (AAK) e ka shprehur haptas dobësinë e saj për LDK-në dhe e ka kushtëzuar çdo pjesëmarrje në koalicionet e mundshme të reja qeverisëse të Kosovës, bashkëngjitjen e saj me LDK-në. AAK-ja ishte partnere e LDK-së në qeverisjen trevjeçare 2005-2007, ku dha tre kryeministra: Ramush Haradinajn, Bajram Kosumin dhe Agim Çekun. Ishte vetë LDK-ja ajo që e përjashtoi partneren e vet, ngaqë nuk pranoi të ishte në koalicion parazgjedhorme të në zgjedhjet e fundvitit 2007, natyrisht e xhelozuar ndaj partneres më të vogël pikërisht pse ajo i ka kryeministrat hazerxhevap.

Lidhja Demokratike e Kosovës do të ishte e detyruar të kishte një parti të vogël si partnere të saj, sepse as numerikisht, edhe sikur të gjitha partitë e pakicave t'i bashkëngjiteshin nuk e krijonte dot shumicën minimale për ta qeverisur vendin. Prandaj nuk do të kishte tjetër rrugdalje, veçse të ftonte në qeverisje Lëvizjen Vetëvendosje, Aleancën për Ardhmërinë e Kosovës ose Aleancën për Kosovën e Re. Po e bëj këtë renditje të tyre nisur nga rezultatet e fituara në zgjedhjet e 12 dhjetorit 2010.

E vetmja së cilës nuk i dihet se çfarë do të kërkonte në shkëmbim të pjesëmarrjes është Lëvizja Vetëvendosje. Por dihet thjesht se kjo Lëvizje e ka pëlqyer partneritetin me LDK-në në opozitë. Nuk do të dihej se a do të kishin këto dy parti të njëjtën kimi ndaj njëra tjetrës nëse do të ishin në koalicion, ku dihet se të tjera instinkte zgjohen dhe të tjera interesa vlojnë. Kështu që Lëvizja Vetëvendosje do të ishte më e mundshmja që të mos merrte fare ftesë nga partnerja e saj e hamendësuar opozitare.

AAK-ja dihet se nga LDK-ja nuk do të kërkonte as më pak dhe as më shumë se Kryeministrin. Kryeministri nga LDK-ja i pat sjellë aq mërzitje dhe aq tronditje LDK-së në ato tri vjet, mërzitje dhe tronditje të cilat i patën arritur atëherë sistematikisht ish Presidentit të Kosovës dhe ish kryetarit të LDK-së Ibrahim Rugova: Pse ai ia dha postin e Kryeministrit AAK-së dhe e uli aq fort pazarin e LDK-së. Ky fakt dhe kry rast nuk ishin të vetmit në mospajtimet dhe në mospërputhjet e shumta të kësaj partie me qeverisjet e saj. Me thënë të drejtën, kjo parti asnjëherë nuk ka gjetur rehat në raportet me qeverisjet e dala prej saj. Nuk gjeti, siç e pamë, as në qeverisjen e kryesuar nga PDK-ja. Kjo e fundit është aq e shfajësuar sa të pashfajësuara janë të parat.

A do të kishte forca të brendshme, pra, LDK-ja të shkëputej nga komplesket e saj të vjetra dhe të pranonte që AAK-ja ta ketë prapë Kryeministrin? Përgjigja ndaj kësaj pyetje do ta prodhontë ponë ose jonë sa është e përgatitur Lidhja Demokratike për ta qeverisur Kosovën, përkatësisht, sa është e përgatitur ajo ta udhëheqë koalicionin e ri qeverisjes, pra qeverisjen e re të vendit.

Kultura qeverisëse e një vendi dhe kultura demokratike e një shoqërie të qytetëruar e kërkon që të gjithë faktorët e tij, të mëdhenj apo të vegjël të jenë të përgatitur për qeverisje, e kërkon që çdo qytetar të jetë i përgatitur për të dalë në krye të qeverisjes së vendit. Kjo kërkesë do të ishte e tepër për Kosovën sot, por nuk do të jetë e tepërt në periudhat e afërta, ndaj të cilave Kosova do të ishte e udhës të ishte e përgatitur sa më shpejt. Kërkesat e tilla janë kërkesa të cilat sigurojnë që politika e një vendi, jeta e një vendi, qeverisja e një vendi të mos bien në krizë kurrë, përballë çfarëdo konkiunkturë sado negative, përballë çfarëdo sfide sado e mbrapshtë.

Si përkrahës historik i Lidhjes Demokratike të Kosovës do të doja të kisha një përgjigje pozitive në pyetjet e mia, por para së gjithash një përgjigje bindëse, natyrisht jo retorike, por praktike në terrenin e realitetit të Kosovës.

(Botuar në Bota Sot më 12 shkurt 2011)