VOAL - Online Zëri i Shqiptarëve - 4 BILL & HILL Nga ELIDA BUÇPAPAJ

Jam lodhur këto kohë me temat politike, me një klasë politike që lë aq shumë për të dëshiruar, sepse nuk e njeh fare gjuhën e komunikimit dhe pa komunikuar është njëjtas si të jesh i izoluar, në bunker, si të vetizolohesh, vetëbunkerizohesh.

Ndaj vendosa të shkruaj për një histori të bukur dashurie për dy njerëz që ne shqiptarët i duam shumë. Ata janë ish-presidenti i 42-të i SHBA për dy mandate, Bill Clinton, që në Kosovë e kanë heroin e tyre dhe Sekretarja e Shtetit Hillary Clinton, e cila mund të jetë presidentja e parë grua në vitin 2017, sepse ky çift shihet si fatsjellës dhe fatbërës për erën e re që u ka prirë shqiptarëve pas konflikteve dhe urrejtjeve etnike e fetare, ku Ballkani e humbi konotacionin arkaik "fuçi baruti" dhe tash njihet si pjesa juglindore e Europës.

"Nëse duhet t'iu besojmë zërave, Bill dhe Hillary Clinton janë të dashuruar." Kështu shkruante Tim Dowling, dy vjet më parë për The Guardian. Dhe më tutje vazhdon: "Dua të them, Bill dhe Hillary Clinton janë të dashuruar me njëri-tjetrin. Tash së fundi, Sekretarja e Shtetit dhe ish-presidenti i SHBA janë parë të kapur për dore në Cafe Carlyle në New York, ndërsa pak ditë më parë shëtisnin përsëri dorë për dore nëpër rrugët e Washingtonit", tregon Dowling.

Kjo martesë ka qenë subjekt i spekulimeve më kontradiktore, i intrigave më mizore dhe i zilive më të pashpirta. Për ca kjo martesë ka qenë si një aleancë strategjike për dy ambiciozë të pandreqshëm, për dy "monstra të vërteta pushtetngrënëse". Për ca të tjerë lidhja e tyre është e pastër dhe shumë e fortë për t'i përballuar dhe për t'iu mbijetuar të gjitha sfidave. Spekulantët e pamëshirshëm vunë dorën në zjarr duke presupozuar se, posa Bill do të përfundonte mandatin e dytë, do të kërkonte divorc, se çifti jetonte i ndarë etj. etj. Por gojët e liga flasin e flasin dhe ata që vunë duart në zjarr, i përcëlluan e përvëluan, kur shohin se si Hill dhe Bill dorë për dorë shëtisin si atëherë kur ranë në dashuri për herë të parë me njëri tjetrin, në vitin e largët 1970 në Yale Law School.

Ata të dy kanë qenë gjithnjë bashkë, në mot me diell e mot me shi, i kanë tejkaluar bashkë të gjitha harrikanët e jetës dhe vazhdojnë të jenë prapë bashkë. Në një endless love - amour sans fin, si në baladën e shpirtit të Lionel Richie me Diana Ross, me një regjistrim dhe duet të ri të Richie me këngëtaren country Shania Twain. Jo më kot gazetari i The Guardian pyet në mënyrë retorike se a mos vallë dashuria e Bill dhe Hill është një Lovestory e kohës sonë? Po, ashtu duhet të jetë!

Nëse i lexon librat biografikë të të dyve, do të shohësh se ata çdo gjë e kanë bërë bashkë, jetën private dhe sociale, fushatat për guvernator, për president, për senatore, për kandidate për presidente; edhe tani gjatë fushatës presidenciale të Obamës, janë çifti më i famshëm dhe kamerat kudoqofshin i kapin duke e përpirë njëri-tjetrin me sy apo duke u përqafuar me njëri-tjetrin si atëherë kur u nisën për në muajin e mjaltit në Acapulco.

Tim Dowling në shkrimin e tij tek The Guardian, kur ka arritur në përfundimin e tij, ka bërë një analizë të hollësishme të jetës të çiftit Clinton. Diku midis të tjerave përmend raportin e New York Times në vitin 2006, sipas të cilit angazhimi i Hillary si senatore bënte që ata të dy të takoheshin 14 ditë në muaj, ndërsa në shkurtin e vitit 2005, arriti kulmi kur u takuan vetëm një herë për Shën Valentin. Por pastaj, kur mbaronin fushatat dhe punët, ah pastaj, ata ishin prapë e prapë bashkë.

Tim Dowling thotë se ata e kanë jetuar romancën e dashurisë së tyre edhe në distancë. Por kur takohen pastaj, ata shpërthejnë prej mallit sa i bëjnë të çmenden kamerat dhe blicet e fotoaparateve, sepse gjithçka që shihet është vetëm vijimi i një dashurie të vërtetë që e ka bërë të jetë proverbial konkluzionin e Hillary Clinton se "Një marrëdhënie e fortë dashurie iu mbijeton kohëve të vështira, andaj mos merrni vendime kur jeni të zemëruar dhe mos e gënjeni kurrë veten, jini të sinqertë me veten tuaj dhe gjithnjë veproni sipas zemrës tuaj, veproni si ju thotë zemra juaj, jo si ju thonë të tjerët!" Ky konkluzion i Hillary Clinton i përjashton të gjitha spekulimet dhe hamendësitë e të pashpirtëve dhe mizorëve, dhe konfirmon atë që thonë për ta miqtë, se dashuria e tyre është një simbiozë, ashtu si e profetizon Aristoteli - një shpirt dhe dy trupa.

E çdokush që ka një bonsens u jep të drejtë miqve të çiftit Clinton. Mjafton të dëgjosh se si shprehet Bill për Hill, ku nuk ke si të mos konstatosh se ai iu bindet veprimeve apo "urdhërave" të saj, tamam sipas atij proverbit të njohur se "dashuria është e verbër" "Love is blind". Kështu u shpreh tash së fundi Bill, kur e pyetën se çfarë planesh ka Hillary për të ardhmen. Ai u përgjigj se tamam tamam nuk e di, porse ai do të jetë dakord me çdo vendim të saj. Pastaj shtoi se Hillary nga gjithë këto ngarkesa është pak e lodhur, se ndofta për të do të jetë më mirë që të ketë një pauzë për të shkruar një libër, e pastaj nëse ajo do të dojë të rikandidojë për zgjedhjet presidenciale të 2016, ai do të jetë me të, do ta mbështesë për çdo vendim të saj!

Një pauzë deri kur fillon fushata e re për president të SHBA, ku ne shqiptarët do të dëshirojmë që presidentja e parë grua e SHBA të jetë Zonja Clinton. Por tani për tani një pauzë, kjo është çka dëshiron më së shumti tani Bill, që pastaj të dy të vazhdojnë romancën në shtëpinë e tyre në New York. Asaj i kujtohet si sot, kur Bill përpara se t'i propozonte për martesë në vitin 1975, kishte blerë për të një shtëpizë të vogël me tulla, ndërsa shtëpia e tyre aktuale në New York ka vende plot. Kushedi edhe Chelsi do t'u bëjë ndonjë surprizë të bukur që pastaj lovestory e tyre të jetë më e bukur se çfarëdo lovestory e filmave të Hollywood-it, ku personazhet janë të trilluar, ndërsa Bill dhe Hill janë realë.