Prishtinë, 18 maj - Universiteti AAB, në një mbrëmje gala, nderoi bilbilin e këngës shqipe, Nexhmije Pagarusha, në shënimin e 80-vjetorit të lindjes së saj.

Në këtë mbrëmje drejtuar nga moderatori i mirënjohur shqiptar, Adi Krasta, u evokuan kujtime nga karriera e gjatë dhe e suksesshme e Nexhmije Pagarushës.

Regjisori Ekrem Kryeziu kujtoi se si Pagarusha arriti sukses maksimal edhe si aktore në një film të tij, film i cili, sipas tij, mori vendin e parë jo vetëm në ish-Jugosllavi, por edhe më gjerë, njofton Kosovo News Network.

"Ajo nuk ishte aktore, por origjinaliteti i saj triumfoi si vlerë", tha Kryeziu.

Në nder të Pagarushës, sopranoja Sanije Matoshi interpretoi këngë të divës shqiptare.

"I nderuari të nderon", ishin fjalët e primadonës së muzikës shqiptare, kur ajo e falënderoi Universitetin AAB për organizimin madhështor në nder të 80-vjetorit të saj.

Gjatë fjalimit, ajo kujtoi edhe çmimin më të madh të karrierës, atë "Nderi i Kombit" që  iu dha nga presidenti i Shqipërisë, Bujar Nishani.

Rektori i AAB, Lulzim Tafa vlerësoi lart karrierën muzikore të Pagarushës.

"Pagarusha meriton këtë manifestim madhështor, sepse ka qenë prezantuesja më e denjë e kulturës shqiptare, jo vetëm në ish-Jugosllavi, por edhe jashtë saj, duke lënë gjurmë të pashlyeshme të brezi i ri i artistëve.

Aktori Enver Petrovci evokoi kujtime nga puna me këngëtaren Pagarusha. Ai kishte përzgjedhur një poezi të poetit Din Mehmeti kushtuar saj.



"Këndoi, këndoi deri sa u shndërrua në këngë", ishin vargjet që i interpretoi Petrovci, duke pohuar se "Nexhmija edhe vetë është shndërruar në këngë".

Të pranishëm në këtë gala mbrëmje ishin shumë figura të njohura të artit shqiptar, të  politikës, shkencës etj.



Universiteti AAB i dha Nexhmije Pagarushës një dekoratë në nder të karrierës dhe kontributit të saj të madh në fushën e artit.

Rating (Votes: )

Comments (0)

Dërgoja shokut

Printo

---