VOAL - Online Zëri i Shqiptarëve - DRITËRO AGOLLI - VJEDHJA E BANKËS SI NË ROMANE, GUVERNATORI PO SHKEL BANKËN, TË MARRË FAJIN

TIRANE- Larg prej ditëve të nxehta të gushtit, ne të "Gazetës Shqiptare" e gjetëm Dritëro Agollin në Pogradec, përkundruall Lasgushit dhe Kutelit. Ky qytet i jep njeriut të letrave, optimizëm dhe freski. Në hotel "Millenium" ku ai po qëndron, hyjnë e dalin njerëz që i kërkojnë shkrimtarit, autografe dhe pos tyre, duan me ngulm ta fiksojnë çastin në një fotografi, e mandej, teksa gjerbin një kafe, e pyesin për politikën e "˜qendrës'. Çështja "Fullani", çfarë do ndodhë me Bankën e Shqipërisë, pse politika po hesht, a pse e zhvesh ajo veten nga përgjegjësitë. Me zërin e qetë, teksa tymos një cigare, Dritëroi bisedon me të gjithë dhe me dashurinë e një gjyshi përkëdhel fëmijët që e përqafojnë. Ai ka një copë here që hesht, pas pyetjes sonë se si e ka "pritur" lajmin e vjedhjes së një sasie të konsiderueshme parash në Bankën e Shqipërisë. Me të njëjtin zë, e me një pamje të trishtuar, thotë se kjo që ndodhi nuk ishte një çudi... Nuk ia ka ënda të flasë gjatë, porse shembujt që jep janë të qartë, ashtu sikundër metaforat. Ndërsa protestuesit firmosin peticione dhe kërkojnë dorëheqjen e guvernatorit Ardian Fullani, njeriu i letrave, përmes "GSH", "˜proteston' me fjalë. "˜Shiu i imët' lag më shumë sa ai i furishmi. "Populli është i varfër dhe kur këta njerëz të shquar, kur këta pasanikë, bëjnë këtë që bënë, atëherë njeriu bie në dëshpërim të madh", thotë Dritëroi. "Ka një lloj ngopje njeriu. Unë kur ha, vjen një moment që ngopem, nuk dua më. Ka një masë", vëren ai, duke shtuar "Kjo e ngrënë që pëlcet, bëhet bombë, pasi ha e ha, dikur pëlcet". Në intervistën e mëposhtme për "GSH", ai jep disa këshilla të urta mbi fajet që duhen marrë përsipër, për reagimin që duhet të ketë politika dhe mbi kontrollin që duhet të ketë mbi një bankë...

Z.Agolli, si e keni pritur lajmin e vjedhjes së Bankës së Shqipërisë?
I kam ndjekur rregullisht lajmet për çështjen e Bankës së Shqipërisë, por nuk jam aq i informuar sa ç'janë analistët apo politikanët. Megjithëkëtë, unë mendoj se kjo që ndodhi nuk ishte çudi. Nuk jemi aq të çuditur për këtë që ndodhi sepse në Shqipëri, si institucionet, edhe individët, pra të gjithë, vjedhin. Domethënë, deri tani ishin vjedhje disi më të lehta, jo se të rëndat kanë munguar.

Ju e konsideroni më të rëndën, por çfarë na thotë ne kjo vjedhje? Si lexohet në opinionin publik?
Kjo e fundit ishte vjedhje si në romane. Për ne që shkruajmë, për shkrimtarët ku hyj dhe unë, kulmi është ky. Kjo ngjarje e arrin kulmin e korrupsionit, kulmin e vjedhjes dhe të shkeljeve. Situata është shumë e rrezikshme, pasi krijon pasiguri në popull, e jo vetëm tek ata që kanë lekë në banka. Një njeri i thjeshtë, që nuk i ndërlikon shumë idetë, mund të mendojë që pas kësaj ngjarje, është më mirë të mos vërë para në banka, pasi nëse një vjedhje e tillë bëhet në Bankën e Shqipërisë, në një institucion aq të rëndësishëm, çfarë ndodh me të tjerat? Ju prisni të ketë ndikime? Situata ndikon, qoftë nga ana materiale, qoftë nga ana psikologjike. Ka trishtim të madh! Ka pasiguri.