VOAL - Online Zëri i Shqiptarëve - KUVENDI I KOSOVËS - VENDIMET QË MUND TË MERREN ME SHUMICË TË THJESHTË NUK KA PSE TË SHTYHEN PËR MË VONËNga SKËNDER BUÇPAPAJ

Për herë të parë dal para lexuesit me një titull kaq të gjatë, ndërkohë që në Kuvendin e Kosovës në seancë plenare deputetët e shumicës së re kuvendore sapo zhvilluan debatin të cilin ua ka ndaluar për muaj të tërë në mënyrën më brutale një kolege e tyre. Kjo kolege, e cila kryesonte seancën konstituive vetëm në cilësinë e më të moshuarës në sallë, një procedurë rutinore e shndërroi në kapje, në marrje peng të Kuvendit të Kosovës nga ana e pakicës së re parlamentare, PDK-së.

Brovina, me vullnetin e saj, nuk i është përgjigjur thirrjes së nënshkruar nga 62 deputetë të Kosovës për të ardhur dhe për të drejtuar vazhdimin e radhës të seancës konstituive të Kosovës. Deputetja më e moshuar e Legjislaturës V të Kuvendit të Kosovës ka zgjedhur që t'i përgjigjet displinës së partisë së saj. Pra, ka zgjedhur që t'i shërbejë mbajtjes në këmbë të një kryeministri i cili u shkarkua nga vota e Sovranit më 8 qershor 2014, t'i shërbejë mbajtjes në këmbë një qeverie zyrtarisht të rrëzuar nga vota e 8 qershorit 2014.

Në këtë mënyrë, nga çdo pikëpamje juridike, por, mbi të gjitha, nga çdo pikëpamje morale, më e moshuara e Kuvendit të Kosovës e ka humbur të drejtën të vazhdojë mëtimin për të pasur ajo monopolin e thirrjes së Kuvendit të Kosovës në punimet e seancës parlamentare, për të pasur ajo monopolin e ndalimit të debatit në Kuvendin e Kosovës.

Shumica e re kuvendore është koha që t'i japë fund drojës, t'iu japë fund ngurimeve dhe luhatjeve në kryerjen e misionit për të cilin janë votuar më 8 qershor. Një shumicë e thjeshtë kuvendore është plotësisht e mjaftueshme për të zgjedhur ose rikonfirmuar kryetarin e ri të Kuvendit të Kosovës Isa Mustafa. Një shumicë e thjeshtë kuvendore është plotësisht e mjaftueshme për të zgjedhur pjesën përkatëse të kryesisë së re, të grupeve të reja kuvendore dhe të komisioneve të reja kuvendore, si dhe të dërgojë tek Presidentja mandatarin e qeverisë së re të Kosovës Ramush Haradinaj.

Nga 8 qershori 2014 po sfidohet vota e Sovranit të Kosovës, po sfidohet institucioni që e përfaqëson Sovranin në mes të dy palë zgjedhjeve kuvendore, pra institucioni i Kuvendit të Kosovës. Është koha që Kuvendi i Kosovës, nëpërmjet shumicës së re kuvendore, të kurorëzuar në marrëveshjen mes katër partive - Lidhjes Demokratike, Aleancës për Ardhmëri, Nismës dhe Vetëvendosjes - të sfidojë sfiduesit e saj të këtyre katër muajve.

Sfiduesit e 8 qershorit 2014, sfiduesit e Kuvendit të ri të Kosovës janë Presidentja e Kosovës, është kryeministri i shkarkuar dhe qeveria e rrëzuar, është status quoja e pamerituar, e shndërruar në gangrenë gjatë 7 viteve të qeverisjes së PDK-së dhe e tejzgjatur në agoninë e këtyre muajve pas 8 qershorit. Këtu nuk po e përmend atë që quhet Gjykatë Kushteutese e Kosovës, por që është shndërruar praktikisht në Gjykatën Antikushtetuese të Çkosovës, kështu, mjerisht, e ka deinstitucionalizuar vetveten, është vetësfiduar përfundimisht.

Kosova ka fare pranë saj përvojën aktuale të Maqedonisë fqinje, ku Kuvendi, Qeveria, të gjitha institucionet po vazhdojnë punën e tyre në mënyrën më normale, pavarësisht se opozita nuk ka marrë pjesë që nga fillimi në punimet e Kuvendit. Shumica në Kuvendin e Maqedonisë ia ka lënë muaj të tërë të hapura opozitës vendet boshe në kryesinë e institucionit, në kryesinë e grupeve kuvendore, në kryesitë e komisioneve kuvendore. Por ajo ka vazhduar t'i marrë të gjitha vendimet dhe t'i miratojë të gjitha ligjet për të cilat mjafton shumica e thjeshtë e votave.

Edhe opozita e re e Kosovës, PDK-ja, do të kthehet në Kuvend kur bashkësia perëndimore ta bindë se është e domosdoshme të miratohen ligjet e cilësuara si ai për Gjykatën Speciale, për FSK-në, për pjesëmarrësit në luftërat e huaja, për reformën zgjedhore e tjerë.

Debati i sotëm kuvendor - e enjte, 9 tetor 2014 - u zhvillua në praninë e mediave. Dhe u ndoq drejtpërdrejt nga publiku nëpërmjet ekranit të vogël. Edhe bashkësia perëndimore, sigurisht, e ka ndjekur në këtë mënyrë. Në debatin e ardhshëm, sa më të shpejtë, le të besojmë dhe le të shpresojmë se në lozhat e Kuvendit të Kosovës do të jenë të pranishëm edhe përfaqësuesit diplomatikë të Perëndimit të akredituar në Prishtinë.

Tashmë qendrat e vendimmarjes në Perëndim po kërkojnë krijimin urgjent të Kuvendit të ri të Kosovës, të Qeverisë së re të Kosovës dhe të të gjitha institucioneve të reja që dalin nga vota e 8 qershorit. Siç e theksuan edhe shumë nga deputetët që e morën fjalën në debatin e sotëm, këto institucione krijohen vetëm në sallën e Kuvendit të Kosovës, në transparencë të plotë ndaj gjithë publikut. Ato nuk krijohen nëpër korridore apo nëpër kthina të errëta dhe të nëndheshme mes liderëve, nuk krijohen nëpërmjet joshjeve dhe shantazheve që do të synonin përjetësimin e një grupimi klanor në pushtet, i cili po profilizon një dikaturë në Kosovë, e fundit e kësaj natyre në Ballkan.

©

8 QERSHORI - NYJA GORDIANE
Nga SKËNDER BUÇPAPAJ
E Mërkurë, 10.01.2014, 10:55amPAPA YNË
Nga SKËNDER BUÇPAPAJ

E Hënë, 09.22.2014, 08:47am

PRESIDENTJA E HODHI GURIN NË LUMË, NJË MIJË TË ZGJUAR NUK E NXJERRIN
Nga SKËNDER BUÇPAPAJ
E Mërkurë, 08.27.2014, 06:59am
TRI JOTË JETIKE TË KOSOVËS
Nga SKËNDER BUÇPAPAJ

E Shtunë, 08.23.2014, 09:05am

REFORMA ORIGJINALE E KRYEMINISTRIT RAMA
Domosdoshmëria e një revanshi femëror në zyrat e partisë dhe të shtetit
Nga SKËNDER BUÇPAPAJ

E Hënë, 08.18.2014, 08:25am
PRANDAJ KUVENDI I RI NUK PO LICENSOHET
Nga SKËNDER BUÇPAPAJ

E Mërkurë, 08.06.2014, 02:30pm

KOSOVA POST-TRAUMË
Nga SKËNDER BUÇPAPAJ

E Premte, 08.01.2014, 04:58pm