VOAL - Online Zëri i Shqiptarëve - KOSOVA TA NDIHMOJË DIASPORËN - QË DIASPORA TA NDIHMOJË MË SHUMË KOSOVËN Me shkas nga fjalimi i presidentes në takimin me biznesmenët shqiptarë në WinterthurNga SKËNDER BUÇPAPAJ

Mendova se mediat nuk ishin treguar të vëmendshme në citimet që kishin bërë dhe në titujt që kishin nxjerrë, prandaj shkova enkas në faqen e presidentes në facebook për të parë fjalën e plotë të mbajtur në "konferencën për përkrahje institucionale për ndërmarrësit e diasporës", siç e quan presidentja takimin e saj të djeshëm me biznesmenët shqiptarë në Winterthur të Zvicrës. Zonja Jahjaga i ishte përgjigjur ftesës nga Programi i Kosovës për Mbështetjen e Ndërmarrjeve të Vogla e të Mesme për të marrë pjesë në takim që të dëshmojë, siç thotë, përkushtimin e thellë të saj dhe të institucioneve të Kosovës 'për t'ju hapur dyert dhe lehtësuar afarizmin tuaj në vendlindje'.

E habitshme ishte se në fjalën e mbajtur prej saj përmendet me terma të përgjithshme roli i diasporës së fuqishme shqiptare të Zvicrës në mbështetje të Kosovës, përmendet përqindja e rëndësishme që dërgesat e shqiptarëve tek familjet e tyre përbëjnë në prodhimin e brendshëm bruto të Kosovës, por me terma konkrete përmenden vetëm arritjet dhe emrat e futbollistëve të Kosovës.

Sa e lexova kryeradhën përkatëse, më lindi pyetja: A u fyen biznesmenët shqiptarë të pranishëm në takim kur nuk dëgjuan asnjë nga emrat e tyre apo të bizneseve të tyre, por dëgjuan të njëjtin avaz, tashmë tejet anakronik, të këtyre 16 viteve për sukseset e futbollistëve shqiptarë në Zvicër?

Bizneset shqiptare në Zvicër janë me qindra e qindra, ekspertët shqiptarë - me paga të larta - pranë bizneseve zvicerane janë të shumtë. Prej tyre ka më shumë të suksesshëm e më pak të suksesshëm. Në zyrën e Presidentes, në ministrinë e Diasporës, në ndonjë institucion qeveritar apo të pavarur të Kosovës a ekziston ndonjë e dhënë për arritjet e diasporës shqiptare në sipërmarrjen zvicerane? Nga koha kur presidentja kishte marrë ftesën nga homologia zvicerane deri në realizimin e vizitës ishte e mundur që ajo të mblidhte të dhëna konkrete nëse ia vlente të përmendte diçka apo dikë, nëse ia vlente të çmonte dikë me ndonjë mirënjohje të veçantë apo jo.

"Sipas vlerësimeve tona, rreth 140 mijë kosovarë të punësuar në Zvicër gjenerojnë brenda vitit më shumë se sa gjeneron e gjithë ekonomia e Kosovës. Kur kësaj t'i shtohen edhe bizneset e diasporës del se potenciali juaj është shumëfish më i madh. Ne kemi nevojë për këto potenciale njerëzore e financiare, për përvojat tuaja, për dijen që keni akumuluar vite me radhë këtu, për kontaktet dhe aftësitë tuaja afariste, që ato t'i vejmë në shërbim të zhvillimit ekonomik të Kosovës." Kështu tha Presidentja. Për më tepër, dihet se pa remitancat e diasporës, ku kjo e Zvicrës ka peshë tejet të veçantë, jeta në Kosovë do të ishte e pamundur, në një kohë kur miliardat që kanë hyrë në këtë vend nga bashkësia ndërkombëtare nuk kanë shkuar për zhvillimin ekonomik të vendit as për mirëqenien e popullit.

Zonja Jahjaga nuk përmendi absolutisht asnjë masë që po marrin institucionet e Kosovës për t'i kanalizuar, pa i shmangur dhe pa i shtrembëruar destinacionet e tyre, të ardhurat që dërgon diaspora. Këto të ardhura është e nevojshme të orientohen, sepse këtu në diasporë ne dëgjojmë shqiptarë të kamur të të thonë se me paratë e tyre ndërtojnë vila në kryeqytetin e Kosovës, në bjeshkët e Kosovës, deri edhe në bregdetet e malet e Republikës së Shqipërisë, në një kohë kur popullsia e Kosovës, moshat e saj më të reja, pra pjesa e saj më vitale i lë përherë e më shumë bosh shtëpitë dhe fshatrat e Kosovës.

Gjithçka në realitetin e Kosovës flet për një mungesë absolute strategjie të zhvillimit të vendit, të rritjes së mundësisë për banorët, sidomos për rininë që të jetojë dhe të punojë në Kosovë. Në reagimet e 12 orëve të para në facebook ndaj fjalimit të presidentes, asaj i sugjerohej se, më mirë se sa të takohej me bizensmenët shqiptarë, presidentja të jepte intervista në nja tri televizione zvicerane dhe të kërkonte që Zvicra, nëpërmjet një kontrate me qeverinë e Kosovës, t'i japë mundësi rinisë për punësime sezonale në Zvicër. Dhe ia kujtojnë presidentes se, që nga viti 1962 ne shqiptarët e diasporës po i ushqejmë familjet tona në Kosovë. Nëse nuk do të ishte nevoja që paratë të shkonin për ushqimin e familjeve, atëherë ato do të shkonin për të ngritur biznese të vogla në Kosovë, ku të mundësonin që të rinjtë dhe të rejat të motivohen sa më shumë për të qëndruar në atdhe.

Zonja Presidente, me të drejtë, ishte krenare kur foli për të rinjtë shqiptarë në universitetet e Zvicrës. Edhe këtu si në gjithë Perëndimin universitetet, më të mirat në botë, kanë plot të rinj të suksesshëm shqiptarë. Por ata deri sot e gjejnë të ardhmen në vendet ku studiojnë dhe nuk shikojnë asnjë mundësi konkrete që dijet t'i vënë në shërbim të atdheut. Edhe ata që bëjnë provë të kthehen në atdhe, shumë shpejt e kuptojnë iluzionin e tyre.

Dikur Ten Hsiao Pini thoshte se Kina do të bëhet kur studentët e saj të kthehen nga Perëndimi dhe t'i vënë në jetë dijet që kanë marrë atje. Në Kosovën ku politikën e bëjnë pikërisht mërgimtarët e deridjeshëm, kryesisht të Zvicrës, nuk mund të mendohet të ketë hapësira për dikë tjetër, aq më tepër për të rinj e të reja me doktoratura nga universitetet perëndimore.

Ndërsa përmendin sukseset e futbollistëve shqiptarë në Zvicër, habitem si zyrtarëve të Kosovës nuk iu ka lindur e nuk iu lind pyetja pse këta futbollistë nuk i investojnë fare paratë e tyre në Kosovë. Dhe pyetja tjetër. A do të ishin të zotë ata t'ua garantojnë investimet bijve të suksesshëm, të cilët, sigurisht, paratë e tyre i investojnë në Perëndim?

Duke dërguar para për ushqimin e familjeve në Kosovë, duke i rrezikuar paratë në investime të pagarantuara, diaspora shqiptare jo vetëm që nuk e pasuron Kosovën, por edhe e varfëron veten e saj. Nga një diasporë të cilën vetëm e shtrydh, siç ankohet me të drejtë ndonjë komentues, realisht nuk ke se çfarë të presësh. Politikat serioze, siç është edhe kjo e Zvicrës, kanë strategji për t'i pasuruar e jo për t'i varfëruar diasporat e tyre. Vetëm në atë mënyrë ato do të shndërrohen në mbështetës të fuqishëm të vendit të prejardhjes.

Politikat serioze, përfshirë edhe këtë të Zvicrës, e kuptojnë se edhe diasporat kanë problemet e tyre, sfidat e tyre dhe nevojën për ndihmë nga atdheu.

Është koha, pra, kur diaspora po e kupton, po vetëdijësohet se tashmë duhet vendosur reciprociteti me vendin e prejardhjes, ku ndërsjelltësia, ku edhe përkushtimi, edhe mbështetja, edhe investimet të mos jenë më të njëanshme.
--
©

KUPOLA - PENG I VETVETES, SHQIPTARËT - PENG I KUPOLËS
Nga SKËNDER BUÇPAPAJ

E Shtunë, 03.07.2015, 11:23am

VILAJETI I KATËRT
Nga SKËNDER BUÇPAPAJ

E Enjte, 02.26.2015, 11:08am
MAFIA JONË - MË E LUMTURA E BOTËS
Nga SKËNDER BUÇPAPAJ

E Shtunë, 02.21.2015, 10:51am
FISHTËN BOTOJENI - MOS E PËRDHOSNINga SKËNDER BUÇPAPAJ (02.02.2015)
Ribotim
PËRSHPIRTNI NAZMI LUKAJT, MIKUT DHE KOLEGUT
Nga SKËNDER BUÇPAPAJ

E Shtunë, 01.24.2015, 06:55pm
Ribotim
PËRSHPIRTNI NAZMI LUKAJT, MIKUT DHE KOLEGUT
Nga SKËNDER BUÇPAPAJ

E Shtunë, 01.24.2015, 06:55pm
Shkruar më 21 janar 2006 (Ribotim)
IBRAHIM RUGOVA - EMRI I SHTETIT TË PAVARUR DHE SOVRAN TË KOSOVËS
Nga SKËNDER BUÇPAPAJ

E Mërkurë, 01.21.2015, 09:02am