Në Kosovë, tek një segment i caktuar, është bërë e
rëndomtë të ndeshemi me një refren absurd, ku mossuksesi ose zvarritja e
mosnjohjeve të shtetit të ri të Kosovës i dedikohet, sipas tyre, të themi më së
paku "burokracisë" së institucioneve ndërkombëtare që veprojnë në
Kosovë. Ky segment, dashur apo padashur, me ndërgjegje apo pa ndërgjegje,
pretendon se prania e këtyre institucioneve në Kosovë është e tepërt dhe jo në
të mirë të Kosovës. Shkohet deri aty sa bëhet përpjekje për t'ia hequr NATO-s
misionin e saj çlirimtar, KFOR-it misionin e mbrojtësit të Kosovës, ndërsa ata
që e shohin NATO-n dhe KFOR-in si burim të lirisë që ka sot Kosova, i
etiketojnë si kuislingë.
Ky qëndrim mohues ndaj NATO-s dhe KFOR-it bëhet kur
nuk ka kaluar asnjë dekadë nga genocidi dhe spastrimi etnik që ndërmori
makineria kriminale e shtetit që kishte pushtuar Kosovën, Serbisë së
Milosheviçit, të cilën e mposhti ushtria e Aleancës Verio-Atlantike, me vendim
të SHBA dhe shteteve përbërëse të saj. Kur NATO hyri në Kosovë ishte populli i
Kosovës që e cilësoi si çlirimtare, dhe Vox Popolo - Vox Dei. T'ia heqësh NATO-s
misionin e saj çlirimtar për t'ia atribuar këtë mision UÇK-së është të bësh
përpjekje për të manipuluar historinë dhe këtë akrobaci ta bësh kur ke një
popull të tërë që e di se si është e vërteta, se UÇK-ja nuk mund ta çlironte
dot Kosovën. Por kjo nuk e ul aspak rëndësinë e saj. Dmth të UÇK-së.
UÇK-ja nuk mund ta çlironte vetë Kosovën, jo se nuk donte,
por sepse e kishte të pamundur ta bënte diçka të tillë, pasi nuk ishte e
armatosur; nuk kishte flotë të aviacionit ushtarak; nuk kishte makineri
ushtarake, ishte e vogël në numër krahasuar me ushtrinë e shtetit pushtues dhe
ishte e përçarë. Ata që përpiqen t'ia heqin NATO-s rolin e çlirimtarit të mos
vazhdojnë më tej, sepse do të shkaktojnë nausea tek populli i Kosovës.
Ata që duan t'ia heqin NATO-s rolin e çlirimtarit, të
mos bëjnë sikur harrojnë se Alenanca Verio-Atlantike është krijuar me
iniciativën e Amerikës e konkretisht Presidentit Truman. Dhe Komandanti i Parë
suprem i NATO-s do të ishte Gjenerali me pesë yje Dwight Eisenhower, i cili më
vonë do të pasonte Trumanin duke u zgjedhr presidenti i 34-tërt i SHBA. NATO është një nga simbolet vitale të
Perëndimit. Pa ndërhyrjen e NATO-s Kosova do të ishte pa të ardhmen që ka sot.
Nëse sot Kosovës ia njohin pavarësinë 69 shtete të
botës dhe do t'ia njohin shpejt edhe një grup shtetesh të tjera për të qenë të
mjaftueshme në votimin që do të bëhet në Asamblenë e Përgjithëshme, kjo i
dedikohet vetëm SHBA dhe shteteve kryesore të BE-së, të cilat dje ndërhynë
ushtarakisht në Kosovë përmes NATO-s, ndërsa kanë 11 vjet që mbrojnë
integritetin dhe sovranitetin territorial të Kosovës përmes KFOR-it.
Nëse pavarësia e Kosovës ka mbetur e mbikqyrur, kjo jo
për fajin e NATO-s, të KFOR-it apo të instucioneve të BE-së në Kosovë, siç
rreken të mbjellin të pavërteta ca pretendues solitarë, por për faktin e njohur
se Serbia është duke përdorur të gjitha mjetet kundër Kosovës.
Jo larg, por vetëm dje, nga Uzhice gjatë një takimi
provokativ me Milorad Dodik, presidentin
e republikës serbe të Bosnje Hercegovinës, presidenti i Serbisë, Boris Tadiç
përsëriti refrenin se "Serbia nuk do ta njohë kurrë Kosovën" dhe se,
sipas tij, ai këtë qëndrim e ka shprehur edhe ndaj "Westerwelle, Clinton,
Sarkozy dhe Merkel". Tadiç nënvizoi edhe një herë se Serbia "do ta
vazhdojë luftën për Kosovën përmes një rruge paqësore dhe diplomatike".
Pra Serbia sot nuk ka ndryshuar qëllimin por ka ndryshuar vetëm mjetet dhe
mënyrat, përmes një diplomacie agresive si dhe duke përfituar nga koniunkturat
e marrëdhënieve midis shteteve të fuqishme të botës.
Nëse bëhen përpjekje absurde për t'ia hequr NATO-s
misionin e saj çlirimtar në Kosovë, bëhet sikur harrohet se nga 28 vende
anëtare të saj, 24 prej tyre, filluar prej SHBA, Anglisë, Francës, Gjermanisë,
Italisë etj. e kanë njohur të parat pavarësinë e Kosovës, dhe janë pikërisht
këto shtete që ndërsa dhjetë vjet përpara e mbrojtën Kosovës ushtarakisht, sot
janë duke e mbrojtur Kosovën në rrugët diplomatike në Washington D.C., në
Pallatin e Qelqtë në New York, në Bruksel, Paris, Londër, Berlin, Romë, në
kryeqendrat e metropoleve të diplomacisë perëndimore. Andaj emri i Kosovës sot
është i lidhur pazgjidhshmërisht me atë të NATO-s, Aleancës Verio-Atlantike. Prandaj e them që
në tillull se vendet e NATO-s që dje e çliruan Kosovën, ishin ato që njohën
pavarësinë e saj dhe sot e mbështesin fuqimisht deri sa Kosova të fitojë
ndejtësen e 193-të në OKB.
(Ky opinion është botuar tek Bota Sot më 31 gusht 2010)
KATEDRALJA E NËNË TEREZËS E BEKUAR NGA RUGOVA SHPREHJE E
PASURISË KOMBËTARE DHE EVROPIANE
Nga ELIDA BUÇPAPAJ
VENDET E NATO-S E ÇLIRUAN KOSOVËN, NJOHËN PAVARËSINË E SOT E MBËSHTESIN FUQISHËM NË METROPOLET E DIPLOMACISË BOTËRORE
Nga ELIDA BUÇPAPAJ
DELIRI I VUK JEREMIÇIT FIKET PËRBALLË LIQENIT TË PERUÇACIT
Nga ELIDA BUÇPAPAJUNIFIKIMI I FAKTORIT POLITIK NË SHQIPËRI NË SHËRBIM TË KOSOVËS DETYRIM EVROPIANO-KOMBËTAR
Nga ELIDA BUÇPAPAJ
SHQIPËRIA NDRYSHE NGA ÇEKIA
Nga ELIDA BUÇPAPAJ
Comments (0)
Dërgoja shokut
Printo
