Voal-online – Dje Parlamenti i Portugalisë miratoi Protokollin e anëtarësimit të Shqipërisë në NATO, çka Kryetari i parlamentit Jaime Gama ia kishte premtuar Kryetares së Kuvendit të Shqipërisë Jozefina Topalli në një bisedë telefonike të pak ditëve më parë. Kryetarja e Kuvendit ka falënderuar homologun e saj Gama për angazhimin e tij personal për përshpejtimin e këtij ratifikimi si dhe deputetët e Portugalisë për votën e tyre pro anëtarësimit të Shqipërisë në NATO. Të martën pritet që ky ratifikim të bëhet edhe nga Hollanda dhe Greqia duke përmbyllur kështu fazën e ratifikimit të protokollit të anëtarësimit të Shqipërisë në NATO nga të gjitha vendet anëtare të Aleancës.

"Pas një viti pavarësie, të gjithë ne, qytetarët e Republikës së Kosovës, kemi të drejtë të jemi krenarë me faktin se nuk i zhgënjyem pritjet e miqve të lirisë sonë", tha kreu i Ekzekutivit. Thaçi nga kryetarët e komunave kërkoi frymë të dinjitetit e tolerancës në këtë përvjetor të parë të pavarësisë, duke dërguar mesazhin e qartë, si një vit më parë, se "liria jonë, shteti ynë, nuk është kërcenim për askënd, por vetëm faktor paqeje dhe stabiliteti në rajon". Por Thaçi paralajmëroi se çdo incident eventual, çdo shfaqje mosdurimi, shkon drejtpërdrejt në dëm të interesave të shtetit të pavarur dhe sovran dhe në favor të atyre që ende flasin kundër Pavarësisë së Kosovës.

Voal-online – Parlamenti i Islandës, me një votë të njëzëshme, i ka thënë sot po pranimit të Shqipërisë në Paktin e Atlantikut Verior, aleancës më të madhe e më të suksesshme ushtarake e politike të të gjitha kohërave. Në seancën e miratimit të protokollit të anëtarësimit të Shqipërisë në NATO ndodhej i pranishëm edhe Ministri i Jashtëm i Shqipërsisë Lulzim Basha, i cili ka shkuar në Rejkjavik, ku ka pasur një sërë takimesh me homologun islandez dhe zyrtarë të tjerë të lartë të Islandës. Tashmë mbeten vetëm edhe tri vende për të miratuar protokollin e Shqipërisë në NATO, çka pritet të ndodhë brenda ditëve të ardhshme. Pas kryerjes së kësaj procedure hapet rruga përfundimtare për anëtarësimin zyrtar të Shqipërisë në NATO.

QIK- Vetëm një qëndrim unik i Bashkimit Evropian, i kombinuar me deklarimin se anëtarësimi në BE për Serbinë do të jetë i pamundur derisa të mos zgjidhet problemi i Kosovës në tërësi, mund të rezultojë me ndryshim qëndrimesh, si te serbët e zakonshëm ashtu edhe te qeveria e tyre. Kështu pohojnë në një artikull të përbashkët Marti Ahtisari, Volfgang Ishinger dhe Albert Rohan, ish ndërmjetësues për Kosovën. Në anën tjetrër, shkruajnë ata, Kosovës i duhet një perspektivë e qartë evropiane dhe ndihma për të kapërcyer sfidat e mëdha me të cilat përballet. 

Zëri I Amerikës - Presidenti amerikan Barak Obama shkon sot në Springfild të Ilinoit, vendlindja e Abraham Linkolnit, për të kujtuar 200 vjetorin të lindjes së ish-Presidentit amerikan. Shumë amerikanë e konsiderojnë Linkolnin si Presidentit më të madh. Linkolni ishte president në vitet 1860, në periudhën e Luftës Civile, kur vendi ishte i ndarë për çështjen e skllavërisë. Abraham Linkolni nënshkroi Proklamatën e Emancipimit, që filloi procesin e lirimit të skllevërve zezakë. Z. Obama, Presidenti i parë afrikanë amerikan i SHBA, mori pjesë mbrëmë në një dramë që u shfaq në Teatrin historik Ford të Washingtonit, ku Linkolnin e vranë në vitin 1865. Tema e dramës ishte një biografi e ish-presidentit amerikan. Z. Obama shpeshherë i është referuar Linkolnit gjatë fushatës së tij presidenciale, për të shprehur nderimin ndaj tij dhe duke bërë një paralelizëm mes tij dhe ish-presidentit amerikan. Voal-online.

Voal-online - Presidenti amerikan Barack Obama ka shprehur përkushtimin për të pasur një bashkëpunim të ngushtë me institucionet qendrore të shtetit të pavarur dhe sovran të Kosovës përgjatë katër viteve të administratës së tij. Në një letër përshëndetjeje që ia ka dërguar Kryeministrit të Kosovës Hashim Thaçi, Obama e ka falënderuar kreun e qeverisë së Kosovës për mesazhin e urimit që ia ka dërguar me rastin e ardhjes së tij në Shtëpinë e Bardhë më 20 janar. “Jam plot besim se mund të punojmë së bashku me një shpirt paqeje dhe miqëse, për të ndërtuar një botë më të siguruar. Kam për qëllim të punoj së bashku me ju dhe të nxit marrëdhënie të mira midis dy vendeve tona,” ka shkruar Presidenti Barack Obama në letrën drejtuar Hashim Thaçit.