13 janar (Voal-online) - Shefi i diplomacisë turke, Ali Babaxhan, në takimet që pati me kryeministrin Hashim Thaçi, presidentin Fatmir Sejdiu dhe në komunikimet që pati me gazetarët në Prishtinë, pohoi gatishmërinë e Turqisë për t’i çuar përpara marrëdhëniet me Kosovën, dhe paralajmëroi edhe njohjen e shpejtë të shtetit të Kosovës nga shumë shtete arabe dhe vende të Konferencës Islamike.

Voal-online - Delegacioni i lartë i Kuvendit të Kosovës kthehet nga vizita katërditore në Turqi. Kryetari i Parlamentit të Kosovës është pritur nga Presidenti Gül, kryeministri Erdogan dhe homologun e tij Köksal Topten. Kryeministri Erdogan do ta vizitojë Kosovën në pranverë. Kryeparlamentari Jakup Krasniqi sapo ka zbritur nga avioni ka deklaruar se në Turqi tashmë dominon besimi se Pakistani dhe Bangladeshi, brenda një periudhe të shpejtë kohore do ta njohin shtetin e Kosovës.

9 janar (Zëri i Amerikës) -Kongresi amerikan zyrtarizoi zotin Barak Obama si presidentin e 44-t të Shteteve të Bashkuara. Ligjvënësit dhe senatorët amerikanë u takuan në një seancë të përbashkët për të çertifikuar rezultatet e zgjedhjeve të nëntorit. Rezultatet zgjedhore nga zgjedhjet presidenciale po kështu do t’i dërgohen Arkivës Kombëtare Amerikane dhe do të regjistrohen në revistën zyrtare të Dhomës së Përfaqësuesve dhe Senatit amerikan. Ceremonia e certifikimitu zhvillua dy javë para se Barak Obama të bëjë betimin si president i Shteteve të Bashkuara më 20 janar në pjesën perëndimore të Kapitolit.  

Vizita e dytë e Presidentit të Shqipërisë Bamir Topi në Kosovë. Gjatë takimit me homologuni e tij Fatmir Sejdiu, ndërsa bëri thirrje që incidentet e fundit në veriun e Kosovës të hetohen nga institucionet e rendit, ai deklaroi se edhe Serbia duhet të respektojë të drejtat e shqiptarëve në Luginën e Preshevës, ashtu si respektohen të drejtat e minoriteteve në Shqipëri e Kosovë. 

7 janar (Voal-online) – Mediat shqiptare kanë publikuar sot se David Miliband, Ministër i Punëve të Jashtme i Mbretërisë së Bashkuar, iu ka dërguar letra 30 homologëve të tij nga vende të ndryshe të botës, ku iu sugjeron ta njohin pavarësinë e Kosovës. Dhjetë nga këto vende thuhet se do ta njohin Kosovën përpara 17 shkurtit, pra njëvjetorit të shpalljes së pavarësisë dhe sovranitetit të Kosovës. Në mesin e këtyre shteteve përmendet të jenë edhe Katari dhe Indonezia, dy vende të cilat kanë nguruar deri tani të hedhin hapin e njohjes së pavarësisë dhe sovranitetit të Kosovës.

7 janar (Evropa e Lirë) - Gjermania do të angazhohet në lobimin për njohjen e pavarësisë së Kosovës nga pjesa e mbetur e BE-së dhe vendet e tjera, ka thënë sot në Prishtinë, Norbert Lammert, kryetar i Parlamentit Gjerman. Keto komente, Lamert i bëri pas takimit që zhvilloi me presidentin Fatmir Sejdiu. Ndërsa e ka quajtur arrestimin paradokohshëm të tre gjermanëve në Kosovë nën dyshimin për implikim në sulmin ndaj ICO-së si një "rast fatkeq",  "Dua të theksoj se njohja e Kosovës nga shumica e vendeve të BE-së ishte edhe rezultat i angazhimit gjerman për ta njohur Republikën e Kosovës dhe se aktivitete të ngjashme të shtetit gjerman do të vazhdojnë edhe në të ardhmen", tha Lammert. /Voal-online.