VOAL - Online Zëri i Shqiptarëve - ED RAMA, ALEATI MË LUAJAL I SALI BERISHËSNga ELIDA BUÇPAPAJ

"Rama më mbështeti që të rrëzoja Nanon", është shprehur dje Berisha nga Durrësi. "Gënjeshtër" ishte reagimi i Ramës nga Maqedonia, ndërsa vazhdon turin për promovimin e kujtimeve të tij, "aq sa Berisha më ka mbështetur të shkruaj "Kurbanin". Nuk po hyj të shtjelloj replikat, por çdo vëzhgues serioz do të arrinte në përfundimin se ajo që thotë Berisha është e vërtetë kur ka parasysh se me humbjen e zgjedhjeve të 2005, Ed Rama u tregua i pamëshirshëm me Fatos Nanon duke ia mbyllur derën dhe sot e mot. Edhe për librin e tij memoaristik, pa Berishën, Rama nuk do ta kishte shkruar Kurbanin, pra këtë sukses të Kurbanit ai do të duhet t'ia dedikojë, përse jo, liderit të shumicës.

Këto shkëmbime replikash midis dy njëshave të politikës shqiptare janë bërë ndërsa Asambleja e PS sapo ka mbyllur hesapet me emrat e kryesisë dhe sekretariatit të partisë më të madhe opozitare, e cila ka për objektiv fitoren e zgjedhjeve të 2013 ! Kështu të paktën sipas deklarimeve dhe pretendimeve të kryetarit të saj!

Në këtë zhvillim shumë të rëndësishëm për PS, së pari, ajo që u vu re ishte dështimi elektronik, çka duket e paimagjinueshme, kur mendon shkallën e logjistikës dhe nivelit intelektual të PS, e kështu të vjen menjëherë të thuash "e si është e mundur ".Pra justifikimi i liderit të partisë për probleme aparaturash nuk është i besueshëm !

Së dyti, nga ata që mbetën, që u përfshinë apo u përjashtuan, del se Ed Rama nuk është marrë me nivelin e përfaqësimit të atyre që vendosi të rrinë, të dalin në krye apo t'i largojë, por me veprime të kulluara pastruese të zërave që e kanë kritikuar Edi Ramën për mënyrën e tij të lidërshipit sidomos prej zgjedhjeve të 2009, gabime të cilat Ed Rama i ka pranuar parimisht, por që, siç rezulton nga veprimet më të fundit, del se nuk ka nxjerrë mësime.

T'i japësh kurorën e dafinave Gramoz Ruçit dhe të përjashtosh Kastriot Islamin e And Harasanin, dy prej fytyrave nga ato të moderuara të PS, të cilat nuk e pranuan bojkotin, grevat dhe djegien e gomave të makinave, më duket një veprim autodestruktiv i Ed Ramës, i cili nuk merr parasysh pasojat.

Edi Rama bën mirë që vazhdon të thotë se nuk do ta afrojë Ilir Metën, sepse, po ta afronte, e gjithë lufta e tij në emër të pastërtisë së figurave dhe kundër korrupsionit do t'i rikthehej rishtaz kundër tij.

Siç rezulton, nga kritikët ka mbetur Malaj, Blushi, Rexhep Mejdani, ndërkohë që kanë mbetur fytyra tepër të vjetra si Sabit Brokaj, Servet Pëllumbi, ka mbetur jashtë edhe fytyra e bukur e Luiza Xhuvanit, apo teknicienë të suksesshëm si Niko Peleshi apo Maqo Lakrori, ndërsa ndaj Fatos Nanos, bamirësit të tij të vërtetë, i cili dha dorëheqjen posa i humbi zgjedhjet 2005, ku Edi Rama ishte shefi i shtabit zgjedhor, lideri i PS vazhdon të tregohet mosmirënjohës dhe me grusht të hekurt.

Pra, po ta gjykosh nga veprimet më të fundit, do të konstatosh se janë veprime pragmatiste ku morali është ëndërr në beze, se janë larje hesapesh diçka që ndodh rëndom në politikën shqiptare, ku secila palë largon ata të cilët i sheh si rrezik personal apo të klaneve, një reminishencë tipike nga periudha staliniste.

Por problemi është se Ed Rama, me këto veprime autodestruktive që i bën të sigurojë fitoren Berishës dhe humbjen e tij të sigurt më 2013, a është, pra, në të vërtetë një "kolonë e pestë" e Sali Berishës, ku e shajnë njëri-tjetrin veç në publik, ndërsa privatisht shtrëngojnë duart me njëri-tjetrin?!

Unë në parim jam me Ben Blushin, në intervistën që ai i dha Sokol Ballës tek Top Channel, se përderisa Ed Rama e ka braktisur bojkotin dhe politikën e rrugës, ai e pranon kursin politik të lideri të partisë së tij. Në fund të fundit, zgjedhje me çmim personal për Ed Ramën. Aq më tepër, për Ben Blushin i cili ka interes që Ed Rama të gabojë sa më tepër, ai ndërkohë shkruan romane dhe fiton publik, kur kihet parasysh se ai pas librave të suksesshëm, është një fytyrë që ka të drejtë të pretendojë kreun e PS pas humbjes të zgjedhjeve të 2013 të Ed Ramës!

Sepse Ed Rama po shkon i sigurt drejt humbjes së 2013. Jo se po mban larg Ilir Metën, por sepse po vazhdon e bën luftë brënda llojit, dhe të asaj pjese të cilën ai do të duhej ta kishte sa më pranë, pasi në fund të fundit ai ka pranuar se ka bërë gabime, të cilat atij ia kishin nxjerrë në pah zërat ndryshe të Kastriot Islamit, Andis Harasanit, Ben Blushit e me rradhë.

Mua në fakt më shqetëson fati i nivelit të përfaqësimit të politikës shqiptare, sepse sa më e dobët të jetë një opozitë, aq më e dobët është qeverisja dhe e kundërta sa më e përgjegjëshme dhe me integritet është një opozitë, ajo dikton rregullat e lojës dhe kërkon standarde edhe për maxhorancën, gjë që nuk po ndodh dhe as nuk pritet që të ndodhë me këto gabime të Ed Ramës, që kanë çmim për të por edhe për shoqërinë shqiptare.

Ed Rama po i humb shanset që ka. Ed Rama ka shans që ta reformojë vërtetë PS-në dhe të ketë ndikim edhe në reformimin e politikës në përgjithësi. Ed Rama ka shans që të ndikojë pozitivisht në luftën kundër korrupsionit dhe në integritetin e politikës në Shqipëri ; Edi Rama ka shans që ta distancojë PS nga e shkuara; Edi Rama ka shans që të afrojë njerëzit e inteligjencies pa marrë parasysh krahun politik, sepse ai pretendon që nesër të jetë shefi i qeverisë shqiptare; pra Ed Rama ka plot shanse, por nuk po i përdor, në fakt po i shpërdor në disfavor të tij, pra nëse flasim me zhargon, po vazhdon me autogole. Nuk e kuptoj përse.

Pra në fund, dua të them se, sado Ed Rama iu përgjegj Berishës përmes Twitter se nuk është e vërtetë se ai e ka mbështetur liderin e atëhershëm të opozitës që ky të rrëzonte Fatos Nanon, unë i them sot Ed Ramës se natyrisht ai këtë që gjë nuk e ka bërë në mënyrë eksplicite, por implicite, jo drejtëpërdrejtë por në mënyrë të tërthortë, ashtu si edhe me veprimet e tij më të fundit, lideri aktual i PS, po tregohet aleati më besnik, më luajal i liderit të atëhershëm të opozitës dhe liderit të sotshëm të mazhorancës për t'ia dhuruar Berishës rishtaz fitoren në tabaka më 2013.

Nuk është absurde, kjo që them është realiste. Politikanët, qofshin edhe të konsumuar, gjithnjë përfitojnë nga gabimet fatale të kundërshtarëve apo rivalëve të tyre. Aq më tepër kur Berisha hyn në fushatën e 2013, të paktën me Tunelin e Krrabës, duke e kthyer Elbasanin në një lagje të Tiranës dhe kur shqiptarët e kanë ndjerë mirë shijen e lirisë duke qarkulluar në Europën e kërcënuar nga krizat.

Dhe me humbjen e tretë, Ed Rama pastaj do të duhet të lajë duart një herë e mirë nga PS.

Duke shënuar sot përvjetorin e lindjes së themeluesit të shtetit të Kosovës

PA IBRAHIM RUGOVËN