Në praninë e personaliteteve të larta shtetërore nga Kosova, Shqipëria dhe
Maqedonia, por edhe të ambasadorëve të shumtë të vendeve të ndryshme të botës
dhe numri të madh qytetarësh, ka nisur në mesditë ceremonia kryesore e shënimit
të pesëvjetorit të pavarësisë së Kosovës.
Presidentja e Republikës së Kosovës, Atifete Jahjaga ka hapur ceremoninë e
parakalimit të Forcave të Sigurisë së Kosovës, në cilësinë e komandantes
supreme të kësaj Force.
Duke nderuar të gjithë ata që kanë kontribuuar për lirinë dhe për shtetësinë e
Kosovës, presidentja ka falënderuar edhe miqtë ndërkombëtarë, Shtetet e
Bashkuara, Bashkimin Evropian dhe të gjitha vendet thera që kontribuuan në
zhvillimin dhe ndërtimin e shtetësisë së Kosovës.
"Në këtë ditë, ne i kujtojmë dhe i nderojmë të gjithë ata që punuan për
atdheun. Ata veprimtarë, ata intelektualë, ata luftëtarë, ata punëtorë, ata
bujq, ata qytetarë që gjatë gjithë jetës, me punën e vet të përditshme, dhanë
kontribut të jashtëzakonshëm në ndërtimin e një shoqërie të drejtë, një
shoqërie të njerëzve të lirë e të qytetarëve të barabartë, të një shteti
demokratik me rend dhe sundim të ligjit, me institucione të përgjegjshme në
shërbim të qytetarit".
"Republika e Kosovës sot është një kontribuuese e rëndësishme për
zhvillimin e marrëdhënieve fqinjësore në rajon, dhe të marrëdhënieve
bilaterale, me synimin e qartë të anëtarësimit në Bashkimin Evropian dhe në
NATO", tha Jahjaga gjatë kësaj ceremonie.
Kryeministri i Kosovës, Hashim Thaçi tha se "Republika e Kosovës është në
rrugë drejt anëtarësimit evropian".
Ai theksoi se "rezultatet që vendi ka arritur gjatë pesë këtyre viteve
janë të kënaqshme, përkundër sfidave".
"Liria dhe pavarësia ka qenë ëndërr për të cilën është sakrifikuar me shekuj të
tërë. Për këtë të arritur madhështore lëvdata kanë edhe qytetarët e Kosovës.
Falënderimi i madh shkon te qytetarët e Kosovës, pa dallim etnie dhe fetare.
Shprehim respektimin më të madh për të gjithë dëshmorët e rënë për të gjithë
luftëtarët që luftuan për këtë liri", ka deklaruar Thaçi, duke rikujtuar se
shteti i Kosovës është njohur nga më shumë se gjysma e shteteve anëtare të
OKB-së dhe se Kosova po ndryshon për të mirë.
Pas fjalimeve të udhëheqësve të vendit, filloi edhe parakalimi i pjesëtareve të
FSK-së, Policisë së Kosovës dhe Zjarrfikësve.
Me flamuj në duar, në rrugë të stolisura për ndër të këtij përvjetori, po
festojnë në mënyra të ndryshme.
Të vetëdijshëm për sfidat dhe rrugën që ka përpara Kosova në konsolidimin e
saj, disa nga qytetarët, nën tingujt e daulleve, shprehin kenaqësinë me të
arriturat e deritashme. Të tjerët ndërkaq, kërkojnë një përkushtim më të madh
nga ata që udhëheqin vendin në përmirësimin e jetës së qytetarit të Kosovës.