VOAL - Online Zëri i Shqiptarëve - Radio Evropa e Lirë - JAHJAGA DHE MOORE BISEDOJNË PËR THEMELIMIN E GJYKATËS SPECIALE PËR KRIMET E LUFTËS DHE TË PASLUFTËS NË KOSOVË

Presidentja e Republikës së Kosovës, Atifete Jahjaga, ka zhvilluar një bisedë telefonike me Drejtorin e Departamentit të shtetit të SHBA-së të Zyrës për Çështjet e Evropës Qendrore dhe Jugore, Jonathan Moore.

Sipas një komunikate nga Presidenca e Kosovës, thuhet se Jahjaga dhe Moore biseduan për zhvillimet e fundit në Kosovë dhe për krijimin e Tribunalit të Kosovës.

Me këtë rast është biseduar për rëndësinë që Kosova të tregojë kredibilitetin e saj si partner i bashkësisë ndërkombëtare, përmes një procesi të pavarur gjyqësor dhe të përmbyllë një kaptinë të vështirë të historisë së Kosovës.

Institucionet e Kosovës, ka thënë me këtë rast, jahjaga, kanë treguar gatishmërinë e tyre për të bashkëpunuar me partnerët ndërkombëtarë dhe se ky proces do të përqendrohet në individë dhe nuk është gjykim i përpjekjeve të përbashkëta të vendit për çlirim.

Ajo ka thënë po ashtu se Kosova ka treguar kurajë dhe lidership për t'u përballur me të kaluarën dhe theksoi se Kosova do të vazhdojë të angazhohet në përpjekjet për të vendosur rendin dhe ligjin.

Po për çështjen e Tribunalit apo Gjykatës Speciale për krimet e luftës, Moore ka takuar dhe pritet të zhvilloj takime edhe me liderët tjerë kosovarë, si nga udhëheqësit e institucioneve ashtu edhe ata të partive politike.

Themelimi i këtij Tribunali është thënë se ka për qëllim zbardhjen e rasteve të dyshuara për krime lufte, që në theks kanë disa vepra të supozuara të kësaj natyre që dyshohet të jenë kryer nga ish-pjesëtarët e Ushtrisë Çlirimtare të Kosovës.

Komuniteti ndërkombëtar, sidomos vendet mbështetëse të pavarësisë së Kosovës po u
kërkojnë institucioneve vendase që të miratojnë themelimin e këtij tribunali në mënyrë që të shmanget mundësia që ai të miratohet përmes Këshillit të Sigurimit dhe Rezolutës 12 44.(rel)