KOSOVËS I MBËRRITI NOTA VERBALE E NJOHJES NGA TANZANIA
E Enjte, 06.06.2013, 06:08am (GMT+1)
Prishtinë - Nota verbale e njohjes së Republikës së Kosovës nga Republika e
Tanzanisë ka mbërritur dje, u bë e ditur nga zyra e zv/kryeministrit Behgjet
Pacolli.
"Lajmi për njohjen nga ky shtet, me ndikim në kontinentin afrikan, është
komunikuar nga zv/kryeministri Behgjet Pacolli nëpërmjet një konference për
medie, të enjten më 30 maj 2013", thuhet në njoftimin e dërguar sonte.
Sipas njoftimit, Pacolli gjatë ditës së djeshme ka zhvilluar një bisedë
telefonike me ministrin e Punëve të Jashtme të Tanzanisë, Bernard Membe, me të
cilin ka diskutuar për hapat e mëtejshëm që duhet të ndiqen, në funksion të
lidhjes së marrëdhënieve diplomatike ndërmjet dy vendeve.
Natyrisht, nga Ministria e Punëve të Jashtme të Kosovës ende nuk ka asnjë
njoftim lidhur me këtë, për arsye se Pacolli nuk e ka dërguar atë notë verbale
në vendin ku duhet të arrijë dhe të bëhet zyrtare kjo njohje.
www.voal-online.ch
|