Prishtinë Kreu i komunës së Skenderajit, Sami Lushtaku, është
liruar nga të gjitha akuzat në gjykimin e rastit "Birn". Pos kryetarit të
Skenderajt, nga akuzat janë liruar edhe Rexhep Hoti, Avni Azemi, Riza Hajdari
dhe Qani Mehmedi.
Kryetari i Skenderajt akuzohej për veprën penale të shkeljes së statusit
të barabartë të banorëve dhe kanosje sepse në periudhën maj-qershor 2009 në
bashkëpunim me disa persona të tjerë kishte nisur një fushatë mediale kundër
Jeta Xharrës, drejtoreshë e Rrjetit Ballkanik për Gazetari Hulumtuese.
Bashkë me të akuzohej edhe ish-deputeti e PDK-së dhe botuesin e InfoPress,
Rexhep Hoti, gazetarët Qani Mehmedi, Avni Azemi dhe Rizah Hajdari.
Lirimin nga të gjitha akuzat rreth rastit BIRN të Sami Lushtakut dhe të tjerëve
e ka konfirmuar sot edhe EULEX-i nëpërmjet një komunikate. Në komunikatën
e EULEX-it thuhet se "një trup gjykues i përbërë prej gjyqtarëve të EULEX-it
dhe gjyqtarëve kosovarë i liroi të pesë të pandehurit në rastin BIRN, pasi që u
vërtetua se aktet për të cilat ata akuzoheshin nuk përbëjnë vepra penale.
Në aktakuzë, Sami Lushtaku, Rexhep Hoti, Avni Azemi, Rizah Hajdari dhe Qani
Mehmedi, akuzoheshin për veprën penale të shkeljes së statusit të barabartë të
banorëve të Kosovës dhe për veprën penale të kërcënimeve.
Rasti ka të bëjë me një fushatë të pretenduar të kërcënimeve kundër gazetares
Jeta Xharra dhe një punonjëse të saj në Rrjetin Ballkanik për Gazetari
Hulumtuese (BIRN) prej anës së gazetës Infopress në qershor të vitit 2009 pas
transmetimit të një programi televiziv (të drejtuar nga Jeta Xharra) që gjoja e
kishte kritikuar kryetarin e Skenderajt dhe rajonin e Drenicës.
Rasti ishte ndjekur penalisht nga një prokuror special nga Prokuroria Speciale
e Kosovës (PSRK)".
Ndërkohë,Prokurorja në rastin "Lushtaku vs Xharra", Mariah Bamieh do të ankohet
kundër vendimit lirues ndaj kryetarit të Skënderajt dhe të tjerëve. "Ajo çfarë
kemi parë në këtë rast, dhe për të cilën shpresonim që gjykata do të pajtohej
me ne ishte se të akuzuarit e kanë vënë Jeta Xharrën në situatë frikësuese.
Kërcënimet dhe shpifjet e bëra kundër saj kishin qëllim të qartë. Të akuzuarit
donin ta frikësonin Jeta Xharrën dhe ekipin e saj, ata donin ta poshtëronin atë
dhe me e rëndësishmja, donin që ta hiqnin nga skena një gazetare kritike dhe të
besueshme, e cila kishte guximin që t'i vinte në pikëpyetje të arriturat
politike të zotit Lushtaku, një figurë e fuqishme politike dhe shoqërore", ka
thënë prokurorja.
Sipas saj, ky është rasti më i rëndësishëm për lirinë e medias në Kosovë, dhe
tregon sa demokratike është Kosova, prandaj duhet menjëherë që Gjykata e Apelit
ta shqyrtojë ankesën për lirimin.